👑 منافس يهز عرش سوق المستعمل
🛌 ليش ايكيا يخلونك تركب أثاثك بنفسك؟
تحب عالم الشركات الناشئة؟
زهقت من المحتوى المسلوق والمكرر؟
حنا مثلك
عشان كذا سوينا هالنشرة اللي بتكون متنفس لنا ولك كل أسبوع 📰
نشرتنا بيكون فيها:
تفاصيل وتحليلات حصرية لأهم الأحداث 🕵️♂️
حركات رهيبة تلهمك 💡
شركات ناشئة جديدة 🇸🇦
تذكير بأهم الإيفنتات + دعوات لفعاليات حصرية📮
نساعدك توظف و تتوظف في شركات ناشئة محلية 🏦
أوه, قبل ماننسى, ترا موجود نكت بايخة و MEMEs
ليش؟ لأن الحياة أقصر من كذا
مصطلحات ريادية:
خلني أستثمر معك بفتح لك أبواب
=
بحط معك خمسين ألف وبغث كل الناس إني مستثمر ملائكي.. بما فيهم أنت
سكوب الأسبوع🕵🏻♂️
من بيت مهجور لجولة Series-A
منصة سوم
المؤسسين فهد بن حسن وفهد البسام في إشارة "صفر لواحد" بعد اللقاء وأمام مكتبهم، المؤسس الثالث بدر المبارك مع الأسف في رحلة عمل ما قدرنا نصوره هالمرة
أعلنت سوم عن جولة استثمارية، كانت هذي تفاصيلها:
حجم ومرحلة الجولة: 67.5 مليون ريال "18$ مليون" - جولة أ (Series-A)
المستثمرين: قاد الجولة جاهز، بمشاركة من الصندوق الأمريكي isometry capital، وصناديق مستثمرين سابقين (خوارزمي - آوتلايرز - الراجحي شركاء)
الجولة السابقة: جولة (Seed)، بقيمة 15 مليون ريال "4$ مليون"، بقيادة صندوق آوتلايرز ومازن الجبير، ومشاركة صندوق خوارزمي وعمار الخضيري ومستثمرين آخرين.
ليش الخبر مهم؟
يؤكد وجود لاعب كبير جديد جاي يهز عرش سوق المستعمل في السعودية بآلية عمل مختلفة عن طريقة عمل المنافسين ويغير سوق المستعمل
التفاصيل:
قابلنا مؤسسين الشركة، وجلسنا مع الشريك المؤسس والمدير التنفيذي فهد بن حسن وكانت هذي أهم النقاط:
حنا 3 أصدقاء كنا نشتغل في أكبر الشركات الاستشارية وعندنا رغبة نأسس شركة عملاقة، تجمعنا وفكرنا بكل الفرص الموجودة ووصلنا لـ 120 فرصة بزنس، وفلترناها لين وصلنا أن شركتنا بتستهدف حل مشكلة (ضعف الثقة في المستعمل)، وهي مشكلة محلولة بأماكن كثيرة عالميا، لكنها ما انحلت في السعودية وباقي أسواق الشرق الأوسط الكبيرة
استغربنا وجود نماذج مشابهة لـ "Craigslist" في المنطقة لكن مافيه نماذج مشابهة لـ Ebay و Stock X و GOAT
اخترنا في بدايتنا أننا نركز ونبدأ بالإلكترونيات، لأن حجمها صغير وقيمتها عالية والطلب والعرض فيها عالي
أول عميل كان من الباحة وشاري آيباد من الرياض، عرف منصتنا من إعلان في تويتر
أول جولة لنا كانت خطة التنفيذ مدتها 18 شهر، اقترح علينا أحد مستثمريننا اللي كان مؤمن فينا تسريع التنفيذ وتطبيق كامل الخطة في 6 أشهر بنفس المبلغ!💸 كانت رسالته (لا تأجل النجاح أو الفشل، اعرف بأسرع طريقة ممكنة عشان تعدل لو احتجت بسرعة)، وطبقنا نصيحته وشفنا أثرها
تجربة المستخدم عندنا سلسة لجميع الأطراف، تقدر تبيع بدون ما ترد على الجوال وتتفاوض وتطلع تقابل المشتري، والضمانات عالية للطرفين من ناحية الاستلام والتسليم وسلامة البضاعة ودقة وصفها
خطتنا من الجولة (نطور المنتج ونقدم خدمات إضافية - نتوسع في الأقسام غير الإلكترونيات - نتوسع جغرافيا🌎)
تجربتنا مع صناديق الاستثمار الجريء والمستثمرين الملائكيين اللي دخلوا معنا كانت ممتازة وسريعة ولمسنا منهم قيمة مضافة كبيرة في التوجه الاستراتيجي والعلاقات
هدفنا من دخول جاهز معنا هو الاستفادة بشكل أكبر من خبرتهم الجبارة في تقديم تجربة عميل استثنائية، وخبراتهم اللوجستية، وكذلك مدى موثوقية علامتهم التجارية (Brand-association)
نؤمن أن منتجنا جالس يغير السوق، بحيث بدينا نشوف محلات تقلص حجمها أو ساعات عملها أو حتى تغلق فروعها وتعتمد تمامًا على البيع عندنا في المنصة، ونزعم أنه اليوم ما فيه محل إلكترونيات مستعملة في المملكة ما يعرف سوم
فيه كثير نماذج مماثلة لنا عالميا صارت Unicorns
حلمنا هو أننا نكون أكبر منصة للبيع والشراء في الشرق الأوسط بحجم ملياري وأكثر🦄، وميزتنا الاساسية ببيئة عملنا اللي نطمح أنها تكون الأفضل في المنطقة ومنها يتخرج رواد أعمال لجميع القطاعات
خدمات الشركة:
بيع وشراء الإلكترونيات المستعملة شاملة التوصيل من باب البائع لباب المشتري وحفظ الأموال لحين تحقق المشتري من سلامة المنتج
حلول وخدمات خاصة للباعة
الشركة شغالة في: السعودية - الإمارات
أبرز أرقام الشركة:
تأسست 2021
التحميلات: 4 مليون
حجم المعروض الجديد شهريا: 30 ألف
العمولة: 10-20% تتراوح حسب نوع المنتج ويتم تقسيمها بين العميل والمشتري
📱موقع وتطبيق الشركة: سـوم
ملاحظة: اللقاء المطول مع مؤسسين سوم بننشره قريبًا بإذن الله، مليان تفاصيل ومعلومات دسمة عن تجربتهم في تأسيس شركة وقصة البيت المهجور!🔥
حركة قديمة بس رهيبة
عندك حليب؟
في 1993 كان معدل استهلاك الحليب جالس يقل والمبيعات تنخفض بشكل ملحوظ 📉
كان كل التسويق حق الحليب يركز فقط على الفوائد الصحية وكان الناس يعاملونه إنه غرض ينشرا إذا قرب يخلص 🥛
وقتها قررت شركات الحليب إنها توظف شركة تسويق إبداعي (شركة صدقية مو مثل بعض ربعنا) عشان يحلون هذي المشكلة لهم واتفقوا على موعد معين لتسليم الإقتراحات 📝
اللي صار إن موعد التسليم جالس يقرب و شركة التسويق ماحصلوا أي إقتراحات مفيدة فقرروا يجيبون مجموعة من الناس ويخلونهم يمتنعون عن الحليب لمدة أسبوع 😖
بعدها, جلسوا مع الناس وسووا معهم لقاءات واكتشفوا إن أغلب الناس حياته فعلا صارت سيئة بدون حليب 🥛😥
اللي ماقدر يأكل الكورن فليكس حقه في الصباح 🥣
واللي ماقدر يغمس الكوكيز حقته 🍪
وقتها على طول عرفوا إن الحملة لازم تكون عن الشعور السيء اللي يجيك لو حياتك بدون حليب
بمجرد إطلاق الحملة حققت نجاح ساحق في:
زادت مبيعات الحليب بعد ماكانت تنقص سنة بعد سنة 📈
9 من أصل 10 أمريكان قدروا يتعرفون على الحملة والبراند 🇺🇸
استمرت الحملة على مدى عشرين سنة واستخدمت المؤثرين والمشاهير مثل طاقم فريندز (خلاص ندري إن ساينفلد أحسن)
ستارت أب فنانة ماحد يعرفها: نزل
أعرض عقارك الآن 🏠 - نساعدك لتأجير وحداتك 🏘️ - ابحث عن منزل أحلامك 🏡
كل الأشياء هذي نزل ماتسويها 🛑🛑🛑
نزل تسوي شيء جديد وغريب, التركيز فقط على الوسيط العقاري 👨🏼⚖️🫖
كل هدفهم في الحياة يخلون تجربة الوسيط هذا أفضل ويساعدونه يحقق أكبر قدر من الأرباح 💰
كيف؟
يخلون كل الوحدات اللي يعرضها أو يديرها في مكان واحد بدون قروشة
أيضا يساعدون الوسيط يسوق عقاراته ويدير الفريق الخاص فيه
إذا أبوك متقاعد وعنده مكتب عقار, نزل بتصير هدية ثمينة 🎁
شيك موقعهم من هنا و رزوا وعبدالمجيد مابيقصرون معكم
قصص وعبر
تأثير ايكيا
لو أقولك فيه محل أثاث:
يبيع شاورما 🌯
إذا دخلت فيه صعب تطلع 🤷🏽♂️
ويخليك تركب أثاثك بنفسك 👷🏼♂️
غير منطقي, صح؟ والغير منطقي أكثر إن الأسباب هذي مجتمعة خلت ايكيا أكثر محل يبيع أثاث في العالم 💰
خلونا نأخذ الأشياء الغريبة هذي وحدة وحدة ونشوف كيف ساهمت في نجاح ايكيا
1. الشاورما والأكل في محل الأثاث
ايكيا مشهورين بكل فروعهم حول العالم بتقديم الأكل بأسعار منخفضة لجذب الناس 🌯
السر وراء هذا الموضوع إن مؤسس ايكيا Ingvar Kamprad كان يؤمن إن الزباين الجوعانين يشترون أقل من الشبعانين 🙆🏽♂️
2. ليش تصميم ايكيا كذا؟
أغلب محلات التجزئة تركز إن تجربة العميل تكون إنسيابية و رحلتك بين المخارج والمداخل واضحة
ايكيا تسوي العكس
ايكيا يتعمد يخليك تمشي في شيء يشبه المتاهة ومليان غرف متعددة
الهدف؟ عشان تقضي كل يومك تفكر بكل غرفة وتتخيلها في بيتك 🏡
أيضًا ايكيا يخلون فيه لفة كل تقريبا 30 متر عشان تتحمس تشوف وش فيه ورا اللفة
3. تأثير ايكيا
في 1950 خسرت شركات خليط الكيك الجاهز لأنهم نزلوا منتج مايحتاج تحط فيه بيض🥚, بس تحط الخليط في الفرن ومبروك عليك الكيكة الحزينة 🥮
مباشرة بعدها تراجعوا عن القرار وخلوا الناس هم اللي يضيفون البيض ومكونات أخرى, عشان يحسون إن الكيكة قيمتها أعلى وطعمها أحلى نتيجة الجهد
القصة هذي, بالإضافة للي يسوونه ايكيا, ألهمت الباحثين إنهم يخترعون شيء اسمه: تأثير ايكيا
تأثير ايكيا باختصار إنه الناس يصير عندهم حب ومشاعر إيجابية للأشياء اللي يحطون فيها جهد 💓
أيضاً, يحسون إن قيمتها أعلى بكثير مما هي عليه والشيء هذا الشيء اللي استغلوه ايكيا بذكاء 🌟
عشان لا تقول ما دريت! أهم الإيفنتات الجاية
صدعت وأنت تدور شركة للتصوير؟ 🎥
لاتتعدا شركائنا الرهيبين Story,Inc
يوثقون لك أحداث شركتك بأعلى جودة وأفضل سعر 💰
إيفنتات الرياض:
Demo Day تقدم 2024
(3 March)
يوم عرض الشركات ضمن مسرعة تقدم التابعة لكاوست، ولأول مرة بيصير في الرياض
Leap 2024
(4-7March)
الحدث الأضخم في المنطقة للتقنيات الجديدة 🧑💻
وظفني في ستارت أب
مطلوب
مراسل
يحب الشركات الناشئة ونقل العلوم
الشركة: صفر لواحد
للتواصل: abdulaziz@0t1.org
تحتاج موظفين لشركتك؟ راسلنا على hire@0t1.org
ملاحظة: ترا مانوصي إلا بناس أذكياء
خاتمة
اهتمّ بالشركات الناشئة اكثر
جدًا سعيد ان فيه نشرة مثل كذا شكرًا بحجم السماء