👩🏻🏫منتجات ثمانية الجديدة مثل ما تشرح الأبلة
2024 توقعات شركات التكنولوجيا لـ 🪩
لا تنسى تضيف إيميلك عشان توصلك نشرتنا طازجة من الفرن
تحب عالم الشركات الناشئة؟
زهقت من المحتوى المسلوق والمكرر؟
حنا مثلك
عشان كذا سوينا هالنشرة اللي بتكون متنفس لنا ولك كل أسبوع 📰
نشرتنا بيكون فيها:
تفاصيل وتحليلات حصرية لأهم الأحداث 🕵️♂️
حركات رهيبة تلهمك 💡
شركات ناشئة جديدة 🇸🇦
تذكير بأهم الإيفنتات + دعوات لفعاليات حصرية📮
نساعدك توظف و تتوظف في شركات ناشئة محلية 🏦
أوه, قبل ماننسى, ترا موجود نكت بايخة و MEMEs
ليش؟ لأن الحياة أقصر من كذا
نقاشات ريادية:
عندنا مشروع يخلق الطاقة من العدم وبيغير العالم و…
VC: تقدرون تخلونه منصة؟
سكوب الأسبوع🕵🏻♂️
قصة التحول
ثمانية
شفتوا إعلان ثمانية اللي قبل أسبوعين؟
حنا مثلكم شفناه ومافهمنا شيء غير إنهم عفويين ويحبون بعض✨، ولذلك اضطرينا نجلس مع الرئيس التنفيذي للتقنية، علي بوصالح, عشان نأخذ العلم
أول شيء لو ما عرفت منتجاتهم الجديد، فهذي هي:
1- منتج منصة التدوين📝:
منصة عربية للتدوينات والنشرات تظهر لك الأفضل فيهم، وتوفر أدوات مميزة للناشرين بالعربية (هي الأفضل على وصفهم)
2- منتج تطبيق البودكاست🎙️:
تطبيق استماع بودكاست بخصائص ذكية، ويتضمن شبكة تواصل اجتماعي لمشاركة حول حلقات البودكاست محليا وعالميا
أهم النقاط اللي أخذناها من جلستنا مع علي حول قصة التحول:
الرؤية أقرب ما تكون لنموذج نتفلكس، بحيث نكون منصة محتوى كبيرة وفيها محتواهم أيضًا مثل Netflix Originals
من وقت انضمام علي قبل سنتين، كانوا عارفين إنهم يبون يميلون أكثر للتقنية لكن ما كان عندهم تصور واضح عن الوجهة
من أهم دوافع هالتحول هو الاستدامة المالية، نموذج عمل الإعلانات غير مستدام وفيه مخاطر
فيه منتج تقني ثالث بيطلقونه بعد شهرين (مرتبط بالبودكاست لصناع المحتوى)
الطابور على التطبيق ما هو لغرض تسويقي، هو لإدارة مشاكل المنتج التقنية بشكل أفضل وكذلك تجربة المستخدم، والتوقع أنه بحد أقصى في رمضان بيكون التطبيق متاح للجميع
الرهان في التطبيق بشكل كبير على (الصالة) كشبكة اجتماعية لمشاركة المحتوى
تفاجأوا بالطلب على منتج التدوين وفاق توقعاتهم
من مستهدفات منتج التدوين هو مصحح لغوي أشبه ما يكون بـ Grammarly للعربية🔍
يوعدون صناع المحتوى أنهم بيلقون أدوات تساعدهم يقدمون محتوى أفضل وبتحديات أقل مع حفاظ على سرية بياناتهم وبيانات متابعينهم
نماذج العمل المتوقعة بتكون ما بين اشتراكات بباقات متنوعة ومشاركة عوائد في الإعلانات مع صناع المحتوى
المقابلة الكاملة مع علي بوصالح مع قصة التحول بتلقونها قريبًا في موقعنا!🔥
توقعات 2024 للتكنولوجيا مع سكوت جالوي
كل بداية سنة جديدة يعطينا سكوت جالوي توقعاته للستارت أب وشركات التكنولوجيا
بس مين سكوت جالوي؟
قبل مايصير سكوت جالوي بروفسور للتسويق في جامعة نيويورك, أسس عدة شركات من أشهرها L2 اللي تم الاستحواذ بـ 160 مليون دولار وشركة ثانية أسمها Red Envelope للتجارة الإلكترونية في التسعينات (مرة بدري وعشان كذا فلست)
سكوت جالوي من أشهر الصحفيين في السليكون فالي ودايم جزء كبير من توقعاته يصيب
بنشارككم ست توقعات لـ 2024:
1. إتحاد شركات عرض المحتوى Streaming 📺
يؤمن جالوي بأن منصات عرض المحتوى تحتاج عدد كبير من المحتوى والمشاهدين عشان تصير مربحة, والشركتين الوحيدة اللي ممكن تحقق هذا الشيء هي ديزني ونتفلكس فقط.
في أمريكا كثير منصات محتوى مثل Hulu, Max وغيرها لكن مصيرها إما تتحد مع بعض أو تستحوذ عليها ديزني أو نتفلكس
يبدو إن التوقع هذا بيصير لأن مؤخرًا, صار فيه اجتماع بين الرؤساء التنفيذيين لشركتي Warner و Paramount عشان يناقشون موضوع الإندماج
2. تيك توك بيفترس نتفلكس وسبوتفاي 🦈
دايم نحس إن المنافسة في مجال الترفيه تكون بين المنصات المتشابهة ( نتفلكس ضد ديزني) (سبوتفاي ضد أنغامي) لكن ننسى إن كلهم هدفهم واحد: أخذ أكبر قدر ممكن من وقتك.
المنصة اللي تتفوق على الكل في هذا هي تيك توك. 🪩
اللي يستخدمون تيك توك بيعرفون إن التجربة تخليك تغطس ساعتين وأنت مو داري, بعكس نتفلكس مثلا تجلس يومين وتستخير عشان تحصل فيلم يناسبك.
وبناء على كذا, جالوي مؤمن إن تيك توك بيأخذ حصة كبيرة من كل منصات الترفيه في 2024
4. شركات الذكاء الإصطناعي بـ تبطبط (لغير متحدثي القصيمية, تبطبط يعني تنزل بقوة) 📉
بالرغم من إن جالوي يتوقع إن تقنية الذكاء الإصطناعي بتغير العالم ومهمة, إلا إنه يتوقع إن تقييمات شركات الذكاء الإصطناعي بتنخفض في 2024
حاليًا ربع تمويل شركات الاستثمار الجريء في أمريكا رايح لشركات الذكاء الإصطناعي و 4 من أصل 5 شركات مليارية لهم علاقة بالذكاء الإصطناعي
هذا خلا تقييمات هذي الشركات مبالغ فيها, يعني شركات مثل OpenAI و Anthropic وصلت لـ 180 و 200 ضعف الإيرادات, مقارنة بشركات ثانية مثل زووم: 5 أضعاف فقط.
4. GLP1 بيصير نجم 2024 🌟
أوكي قبل ماتبدأ تحس إنها حصة علوم, GLP1 هو عبارة عن التقنية المستخدمة في أدوية إنقاص الوزن اللي انتشرت مؤخرًا مثل أوزمبيك ومنجارو.
سكوت جالوي يتوقع إن تأثير هذي الأدوية على الاقتصاد بيكون أعظم على المدى القريب من الذكاء الإصطناعي 🤖
ليش؟
حجم السوق الضخم جدًا TAM, في أمريكا لحالها زادت حالات البدانة لثلاث أضعاف في آخر خمسين سنة, ونسبة 70% من الأمريكان حاليًا يشتكون من البدانة أو أعراضها
أضف لذلك, تكلفة البدانة على الاقتصاد الأمريكي تقدر بـ 1.7 تريليون دولار (أرسلنا كم صفر في هذا الرقم وبنعزمك على الركن التهامي جنب مكتبنا🍛)
5. إيلون ماسك يبيع أو يتخارج جزئيًا من تويتر 🐦
التوقع هذا مبني على شيئين:
a. إن إيلون ماسك متوقع يصير عنده مشاكل في التدفقات النقدية
الكل يعرف إن ثروة إيلون ماسك مرتبطة بشكل أساسي بـ Tesla و SpaceX, يعني كل ما أرتفعت قيمة الشركات هذي زادت ثروته والعكس
اللي حاصل إن ماسك اضطر يتدين يوم شرا تويتر عن طريق رهن الأسهم في هذي الشركات ولو خيروه بينها وبين تويتر, بيختارها على طول بدون تفكير
b. مشكلة تويتر مع المعلنين
جزء كبير من دخل تويتر يجي من الإعلانات, وماسك ماشاء الله عليه نحشهم مثل ماهو واضح في الصورة
6. واتس أب بيكون مفاجأة السنة 😱
مع وجود ثلاثة مليار مستخدم, كل الناس كانوا يتوقعون إن شركة ميتا, الشركة المالكة لواتس أب, بتبدأ تفكر جديًا تطلع منه فلوس 💲
لكن اللي صار إنه أولويات الشركة كانت دايم لأشياء ثانية (ميتافرس, الذكاء الإصطناعي, حرية التعبير…إلخ)
هذي السنة شكل ميتا بتخلي واتس أب من أولوياتها, زكربيرغ الرئيس التنفيذي لمح أكثر من مرة نهاية السنة الماضية إن
واتس أب بيكون فيه “خدمات” ذات قيمة أعلى وبتحقق قيمة أيضا لملاك سهم ميتا 💰
ستارت أب فنانة ماحد يعرفها: لوازم
مين يحب يتعامل مع الموردين؟
الجواب: ولا أحد 💔
اللي كانوا مسؤولين شراء أو حتى شباب الإتش آر اللي يخلونهم يشترون أغراض المكتب, يعرفون إنه من أغث الأشياء تروح تدور لك موردين لاحتياجات المكتب: مناديل, موية, قهوة, أغراض مكتبية
لوازم عندها حل سحري, تخليك تشتري كل الأشياء هذي من مكان واحد وتوصلك لين عندك 😲
نشكرعبدالحكيم البشر وناصر الشايع على الحل وهذا موقعهم للي حاب
حركة قديمة بس رهيبة: أنت مو أنت وأنت جوعان
أنطلقت حملة سنكرز: أنت مو أنت وأنت جوعان في 2010 في أمريكا وحققت نجاح ساحق ولذلك تم استخدامها في أكثر من دولة بما يتناسب مع ثقافة الدولة. 🌍
الحملة حققت زيادة في المبيعات بنسبة 16% في أمريكا و35.7% عالميا بعد ماكانت المبيعات في إنخفاض مستمر لثلاث سنوات. 📉
الحملة تلعب على فكرة إنك ماتكون نفسك وقت الجوع لدرجة تصير شخص ثاني - مثال
طيب كيف نجحت الحملة وكسرت الدنيا؟
هذي أربع أسباب سريعة:
توطين الأفكار
الحملة خلت رسائلها تناسب كل دولة انعرضت فيها (مثلا في مصر ماجابوا ممثلة أمريكية, جابوا المزموزيل رجاء الجداوي)
خفة الدم
في عالم الدعاية والإعلان, لو قدرت توصل فكرتك عن طريق الضحك بيكون أثرها أقوى, لكن فيه مخاطرة كبيرة إنها تطلع ثقيلة دم (اللي يبي مثال يشوف أي إعلان منتشر حاليًا)
استخدام المؤثرين والمشاهير
استخدام المشاهير فكرة ممتازة بشرط إنه السياق يكون مناسب, مانجيب شخص عشانه مشهور وخلاص
الرسالة
الرسالة حقة الحملة كانت سهلة: ترا يوم تجوع تسوي أشياء ماتخليك نفسك
أيضا التاق لاين: أنت مو أنت وأنت جوعان, سهل إنك تتذكره
عشان لا تقول ما دريت! أهم الإيفنتات الجاية
صدعت وأنت تدور شركة للتصوير؟ 🎥
لاتتعدا شركائنا الرهيبين Story,Inc
يوثقون لك أحداث شركتك بأعلى جودة وأفضل سعر 💰
إيفنتات الرياض:
منتدى تجربة العميل
(25-24 يناير)
الرياض
Demo Day تقدم 2024
(3 مارس)
يوم عرض الشركات ضمن مسرعة تقدم التابعة لكاوست، ولأول مرة بيصير في الرياض
Leap 2024
(7-4 مارس)
الحدث الأضخم في المنطقة للتقنيات الجديدة 🧑💻
خاتمة
