💔🇸🇦 رائد الأعمال السعودي اللي ماحد يحبه

📚😲 اختصر ست شهور في بناء التقنية المالية مع هذا الكتاب

صفر لواحد

Apr 30, 2024

تحب عالم التجارة والشركات الناشئة؟

زهقت من المحتوى المسلوق والمكرر؟

حنا مثلك

عشان كذا سوينا هالنشرة اللي بتكون متنفس لنا ولك كل أسبوع 📰

نشرتنا بيكون فيها:

تفاصيل وتحليلات حصرية لأهم الأحداث 🕵️‍♂️
حركات رهيبة تلهمك 💡
شركات ناشئة جديدة 🇸🇦
تذكير بأهم الإيفنتات + دعوات لفعاليات حصرية📮

في عالم الشركات الناشئة:

كل كلامنا يكون بالعربي لين يجي طاري القروش فجأة نصير خواجات و دولارات

حصريًا: جلستنا مع الأب الروحي للتطبيقات في السعودية📱

جلسنا مع محمد ملياني وكانت ليلة لاتنسى ❤️

جلساتنا حصرية للمشتركين معنا في النشرة, إذا ما اشتركت من هنا 👇🏼

الجلسة كانت بدون تصوير وتسجيل عشان الضيوف والحاضرين يأخذون راحتهم 🎥❌

استضفنا على المسرح: محمد ملياني المؤسس والرئيس التنفيذي لشركة نقودلت 💳

حاوره عبدالعزيز النفيعي من صفر لواحد 👓🎤

الجلسة ركزت على بناء الشركات الناشئة خصوصا في التقنية المالية

نبذة سريعة عن الضيف:

اكتشف محمد ملياني حبه لعالم التقنية من سن صغير (أيام المنتديات) وكان عنده تجارب في عالم البزنس بدءًا من توفير خدمات الاستضافة للمنتديات في بداية الألفين وحتى تأسيس شركات معروفة الآن مثل وقود-تك و لوسيديا

ألف ملياني أكثر من كتاب في التقنية, من أهمها دليل صناعة التطبيقات واللي كان من أوائل الكتب اللي تكلمت عن الجانب التقني للتطبيقات في العالم العربي وتم بيع أكثر من 5000 نسخة 📚

هذي نقاط سريعة من اللقاء للي ماقدر يحضر:

الإحترام أساس العلاقة بين الشركاء. عادي تتهاوشون لكن دام فيه احترام تقدرون تحلون مشاكلكم🤝
لأسباب قانونية, أحرص على تسجيل كل شيء له علاقة بالموظفين مهما كان عدد الفريق صغير. على سبيل المثال: أوقات الإجازات والحضور والإنصراف (حتى لو إنها غير مهمة بالنسبة لطبيعة عملكم)
شركات التقنية المالية تحتاج موارد أكبر نسبيًا و لازم المؤسس يكون حريص (ماكان ودنا نقول بخيل)
إذا جالس تفكر تسوي شركة في التقنية المالية, من أسرع وأفضل الأشياء اللي تسويها إنك تستخدم أداة فنتك السعودية عشان تعرف إذا فكرتك تحتاج تشريعات معينة أو لا
التشريعات في الفنتك أقوى من غيرها لكن بالنسبة للضيف, الموضوع مايفرق لأن الصملة مطلب للنجاح في الشركات الناشئة سواء كانت فنتك أو غيرها
أعظم فائدة من مسرعات الأعمال إنها تعرفك على الشركات الناشئة المختلفة و تخليك تحتك فيهم (نفس اللي أنت تسويه الحين يوم تقرأ نشرتنا 📰)
بالنسبة للمستثمرين, ذكر ملياني نقاط كثير واضح إنه غشها من نشرة سابقة لنا تكلمنا فيها عن كيف تختار المستثمر المناسب لك
ذكر الضيف إنه لو قرأ من البداية كتاب The Anatomy of the Swipe: Making Money Move كان اختصر على نفسه أقل شيء ست شهور من التعلم

في الجزء الأخير من اللقاء وزعنا تيشيرتات مجانية وصار فيه فرصة للحضور يتعرفون على بعض 🤝

ما حالفك الحظ تحضر؟ أبشر بعزك المرة القادمة بنختار مكان أكبر وبنتشرف فيك معنا ❤️

تخيل بس 💥

يكون لشركتك حضور وسط فعالية الكل متحمس لها 🙋🏻

مهتم؟ تواصل معنا على newsletter@zto.sa

على السريع: قطاع المطاعم مع تيكر Taker

لا نخفيكم إن خبرتنا مع قطاع المطاعم تنتهي أول مايوصل الطلب من التطبيق, وعشان كذا جلسنا مع عبدالله السعدي المؤسس والرئيس التنفيذي لتيكرعشان يعطينا فكرة وش قاعد يصير💡

قصة تيكر

تيكر بدأت كسوفتوير SaaS يساعد المطاعم في توصيل الطلبات

يوم تطلب أونلاين من مطعم, بيكون فيه جزئين للموضوع:

استقبال الطلب والتعامل معه
التوصيل

تيكر اكتشفوا إنه عشان يسوون الثانية لازم يتدخلون في الأولى فسووا تغيير في نموذج العمل والحل اللي يقدمونه لين صار حل متكامل للمطاعم, يساعدها إنها تأتمت عملياتها في موضوع الطلبات عن طريق التطبيقات📱

كيف؟

يعطون المطعم بنية تقنية متكاملة تشمل: تطبيق وموقع خاص للمطعم, ربط مع بوابة الدفع, ربط مع شركات التوصيل (بالمناسبة ترا أغلب اللي يوصلون طلباتك من هنقرستيشن وجاهز هم موظفين يتبعون شركات🚚)

قطاع المطاعم:

القطاع حجمه 80 مليار ريال بنمو سنوي يقارب 9-11%

طيب قطاع الطلبات أونلاين كم حجمه من هذا السوق؟ 20 مليار بنمو سنوي 30-35% 😲

نمو طلبات الأونلاين في المطاعم جاي بكل بساطة من إن التقنية والجوالات في كل بيت و جاهزية البنية التقنية في السعودية🇸🇦❤️

هل المنافسة سهلة في القطاع؟

أكيد لأ

ذكر عبدالله إن هنقرستيشن وجاهز رفعوا المعايير بشكل يخلي منافستهم صعبة (مثلا طلبك يوصل في مدة قليلة وإذا صار عندك مشكلة على طول خدمة العملاء يردون عليك… هذي تشغيليًا صعب تسويها إذا أنت شركة جديدة 🐣)

تقول الأسطورة: إذا تبي تنافس هالعملاقين جهز 100 مليون دولار 💰

موقع ولا تطبيق؟

من المعلومات المثيرة للاهتمام اللي ذكرها لنا عبدالله إن سلوك الناس اللي تطلب من المطاعم مختلف عن سلوك التجزئة في الأونلاين

أغلب متاجر زد و سلة مثلًا يبيعون عن طريق الموقع, بينما الناس يوم تطلب أكل تحب تطلب عن طريق تطبيق مو موقع حتى لو اضطروا يحملون تطبيق جديد خاص بمطعم واحد

وقف عندك 🛑✋🏼

إلى متى يلعبون عليك بالأسعار الغالية؟ 💸

كيان توصلك لدوامك ولأي مكان تبيه بأفضل سعر ✅

ملاحظة: ممكن يوصلك واحد من عيال الشاعر 👨🏻‍⚖️

حمل التطبيق من هنا 🚕

بروفايل: حسن عسيري…رائد الأعمال 🎬

ندري إن 9 من أصل 10 أشخاص يقرأون هذا الجزء ما يحبون حسن عسيري

لكن خلونا نفكر في حسن عسيري رائد الأعمال

أنتقل حسن مع أهله للمدينة العسكرية في تبوك وهو صغير. وقتها اكتشف إن بنفس المكان فيه ناس كثير من أهل الجنوب كانوا يشتاقون للنباتات العطرية (البرك - الريحان - الوزاب…إلخ) 🌿

فقرر إنه يزرعها في بيتهم ويحطها في باكج واحد ويبيعها عند المسجد

اللي صار إنه حقق نجاح كبير وصار يوظف أخوياه من المدرسة معه يزرعون في بيوتهم وهو يأخذها و يوزعها (واضح من هنا جات فكرة الإنتاج والتوزيع الفني)

المرحلة الجامعية

أنتقل حسن لمدينة جدة وصار يدرس في الجامعة, لكن بنفس الوقت رائد الأعمال الصغير اللي فيه رفض إنه يكتفي بالدراسة, فقرر يشتغل في سوق الخضار والفواكه 🥬

أكتشف حسن إن أفضل وظيفة فيها كاش سريع هي إنه يصير محرَج (للناس الكيوت: المحرَج هو الشخص اللي يوقف قدام بضاعة ويحمس الناس يشترونها عن طريق فتح المزايدة بين الحاضرين 🗣️)

حقق حسن نجاح كبير في سوق الخضار, لكن عينه كانت دايم على الأضواء والتمثيل والشهرة ✨

العمل الفني

حسن كان مهووس بفكرة التمثيل, لكن ماحد كان راضي يعطيه فرصة

هل قرر إنه يستسلم ويصير موظف في وزارة الزراعة؟ أكيد لا

نشب لمخرج أردني في السعودية لين قرر يعطيه فرصة في التمثيل في عمل يتصور في الأردن سنة 1988 اسمه وقال الحكيم

وبعدها شارك في أعمال مصرية بلهجة مصرية, وكان الوضع مثل ماتتخيلون بالضبط… فشل تام باعتراف حسن عسيري نفسه ❌

الإنتقال للإنتاج

بعد ما دخل المجال الفني وجرب التمثيل, اكتشف حسن عسيري إن فيه فرصة كبيرة في الإنتاج للمسلسلات وقرر ينتج عمل اسمه بعض الناس

المسلسل فشل بقوة لدرجة إنه توقف عرضه من التلفزيون بدون ما يكملونه 👎🏼

أي شخص طبيعي بعد سلسلة الفشل هذي غالبا بيوقف الرحلة وبيشوف شيء ثاني يسويه, أو على الأقل يرجع لأشياء حقق فيها نجاح (سوق الخضار مثلا)

لكن حسن عسيري سواء حبيته أو ماحبيته أثبت إنه رائد أعمال صدقي وقرر يصمل💪🏼

نتيجة الصملة؟

حسن عسيري حاليًا من أكبر المنتجين في الشرق الأوسط في سوق المحتوى والمسلسلات وكل الفشل اللي راح كان خبرة تراكمية ساعدت عسيري يصير من أوائل رواد الأعمال السعوديين في قطاع الميديا والإنتاج 🎭

المستفاد من القصة:

الصملة أول وأهم صفة لازم تكون عند رائد الأعمال
الفشل مهما كان مؤلم إلا إنه رحلة تعلم مفيدة
الفضول وتجربة الجديد صفة حميدة لو وجهتها في المكان الصحيح

ستارتب فنانة ماحد يعرفها: أبعاد⚙️

أفضل المنتجات اللي تكون مشكلة لحل, وهذا اللي سواه إبراهيم الغلاييني في أبعاد ⚙️

يوم كان طالب في الجامعة, واجه إبراهيم مشكلة تصنيع نماذج أولية لبعض المشاريع اللي كانت مطلوبة منه 📗

وبعد فترة من التفكير, لاحظ إن المشكلة هذي مو بس عند زملائه الطلاب, المشكلة موجودة حتى عند بعض الشركات اللي مطلوب منها تصنع نماذج لبعض المنتجات🧑🏻‍🔧

ومن هنا جات أبعاد اللي تقدم خدمة الطباعة ثلاثية الأبعاد مع خدمات كثير أخرى مثل القص بالليزر وتصنيع وتصميم النماذج الكهربائية والهندسية (أوكي واضح المهندسين بيحبونها👷🏻‍♂️)

نتمنى له التوفيق 👏🏼