حصري: أسرار جولة الـ 52 مليون لشركة نيرباي
كيف تبيع المشاعر على شكل منتج؟
تحب عالم الشركات الناشئة؟
زهقت من المحتوى المسلوق والمكرر؟
حنا مثلك
عشان كذا سوينا هالنشرة اللي بتكون متنفس لنا ولك كل أسبوع 📰
نشرتنا بيكون فيها:
تفاصيل وتحليلات حصرية لأهم الأحداث 🕵️♂️
حركات رهيبة تلهمك 💡
شركات ناشئة جديدة 🇸🇦
تذكير بأهم الإيفنتات + دعوات لفعاليات حصرية📮
نساعدك توظف و تتوظف في شركات ناشئة محلية 🏦
أوه, قبل ماننسى, ترا موجود نكت بايخة و MEMEs
ليش؟ لأن الحياة أقصر من كذا
مصطلحات ريادية:
أدور شريك تقني
=
أدور واحد دافور يخليني غني 💲
سكوب الأسبوع🕵🏻♂️
بعد +3 سنوات بناء بدون بيع وصلوا لتوسع دولي وجولة بقيمة +50 مليون! 💰
محمد العيبان وحمزة الغامدي، مؤسسين نيرباي مع إشارة “صفر لواحد”
أعلنت Nearpay عن جولة استثمارية، كانت هذي تفاصيلها:
حجم ومرحلة الجولة: 52 مليون ريال "14$ مليون" - جولة أ (Series-A)
المستثمرين: قاد الجولة سنابل للاستثمار وشارك فيها صندوق CIF التابع لـ stc، وصناديق فيجن - هلا - أرزان
الجولة السابقة: سبقها ثلاث جولات آخرها كان (Pre-series A) في أكتوبر 2022 بقيمة 13.5 مليون ريال، بقيادة فيجن ومشاركة هلا وأرزان
ليش الخبر مهم؟
نيرباي مجالها هو البنية التحتية للمدفوعات، وهو نوع نادر نشوف فيه شركة سعودية، فإنطلاقتهم الحالية واستهدافهم الأسواق العالمية تعطي بشارة كبيرة بأننا قادرين نبني أصعب التقنيات محليا ونصدّرها عالميا!🇸🇦🌎
وش المنتج؟
البنية التحتية التقنية اللي تنبني عليها حلول الدفع عن طريق الـ NFC (أنك تقرب جوالك لجهاز نظام البيع وتدفع)، هالبنية التحتية هي اللي تستخدمها الشركات مثل رواء وجيديا ونيوليب لأنظمة أجهزتهم 💻
التفاصيل:
سوينا جلسة خاصة مع محمد العيبان، الشريك المؤسس والمدير التنفيذي لنيرباي بهالمناسبة، وكانت هذي خلاصة النقاط:
بدينا نبني التقنية قبل نعرف حتى وش المنتج النهائي ونموذج العمل!
جولتنا الاستثمارية الأولى قابلنا فيها 15 مستثمر ما فهمونا ولا عرفنا نشرح لهم، لين قابلنا مستثمر ملائكي متمرّس في الاستثمار وقرر يستثمر خلال 20 دقيقة فقط! وبيومين بعدها قفلنا مع الباقين
فترة بناء المنتج استغرقت 3 سنوات و3 شهور، وكان أصعب تحدي خلالها هو التمويل بحكم أننا ما بدينا نبيع وقتها
هالجولة استغرقتنا 9 شهور، وهي أول جولة مسعّرة، بعد ثلاث جولات من اتفاقيات SAFE
قرارنا الاستراتيجي حاليا هو التركيز الكامل على التوسع دوليا والاستمرار في تطوير المنتج، والجميل في مجالنا أن تراخيصنا الحالية تعتبر فعالة على مستوى العالم كله 🌍، إلى نهاية 2025 هذي أهدافنا
انضمام سنابل معنا بشكل أساسي لأنهم الشريك المثالي للمساعدة في التوسع الدولي، وصندوق stc لأنهم يفتحون لنا أبواب كبيرة بأذرعهم من تقنيات ومنتجات وعملاء
أبرز أرقام الشركة:
التأسيس: 2019
العملاء (شركات): 37 عميل
عدد دول العملاء: 6 دول (مستهدف الوصول لـ 15 بنهاية العام القادم)
حجم العمليات: الرجال موقع خمسين NDA فعجزنا ناخذ منه أرقام
ملاحظة: اللقاء المطول مع محمد بننشره الأسبوع القادم بإذن الله، مليان تفاصيل ومعلومات دسمة عن تجربتهم وقطاعهم!🔥
حركة قديمة بس رهيبة
في 2011 كانت كوكاكولا تمر بإنخفاض في المبيعات استمر لمدة 10 سنوات 📉
كانوا يعرفون أن الأفكار التقليدية ماراح تفرق كثير وعشان كذا سووا شيء كان ضد كل مبادئ التسويق المتعارف عليها:
أطلقوا حملة شالوا فيها شعارهم المشهور وحطوا بداله أشهر 150 اسم لكل دولة 🌍
وش اللي صار؟
نجاح ساحق 💥
الكل صار يدور علبة كوكاكولا اللي باسمه، ناس كثير صاروا يدورون أسماء أصحابهم عشان يهدونها لهم
في ذاك الوقت مع إن السوشال ميديا في بدايتها كان الناس يشاركون صور العلب اللي عليها أسمائهم وانتشر الموضوع لين صار ظاهرة عالمية!
وش كانت نتائج الحملة؟
1. باعت كوكاكولا مايقدر بـ 250 مليون علبة
2. زاد عدد المتابعين لصفحة الفيسبوك بـ 25 مليون متابع
3. يقدر عدد الصور اللي شاركوها الناس بـ 500 ألف صورة
طيب وش كان السبب وراء نجاح حملة فكرتها بسيطة مثل هذي؟
أولا: الأسماء خلت الناس تحس إن المنتج هذا لهم تحديدًا
يوم تحس إن الشيء لك تستمتع فيه أكثر وتزيد قابلية إنك تشارك التجربة مع الناس
ثانيًا: أفضل أنواع التسويق اللي ما تحس إنه تسويق
شكل العلب وعليها أسماء وبدون رسائل معقدة وبين السطور شجعت الناس على تبني وحب الفكرة
ثالثًا: المخاطرة
لو قلت لأي متخصص بالتسويق بشيل الشعار حقي وأحط بداله شيء ثاني, ممكن تجيه سكتة
بس اللي سوته كوكاكولا إنها قررت تأخذ مخاطرة والموضوع طلع مجزي
وش اللي صار بعدين؟
بعد مانجحت الحملة كوكاكولا قررت تستثمر أكثر فيها وتوسع نطاقها لدول كثير وتزيد عدد الأسماء من 150 لـ 1,000 اسم
أيضا أطلقت متجر إلكتروني يخليك تقدر تحط الكلمة اللي تبيها على العلبة
ستارت أب فنانة ماحد يعرفها: استنار
تخيلوا علم النفس وعالم الأعمال مضروبين في خلاط, النتيجة بلا شك استنار 💡
أسست هاجر القايدي شركة استنار لمساعدة الموظفين والشركات للوصول لأقصى قدراتهم عن طريق
علم النفس التنظيمي 👩🏻🔬
طيب وش الفائدة النهائية اللي نتوقعها؟
تحسين بيئة العمل وتحسين أداء الموظفين 📉
كيف؟
- معالجة الاحتراق الوظيفي 🔥
- تقليل عدد الاستقالات
تحسونه فنان لدرجة ماتصدقون؟
أوكي التجربة خير برهان 👍🏼
هذا موقعهم، احجزوا جلسة وحدة وعلمونا وش يصير
قصص وعبر
عندك رولكس؟
الساعة اللي تعطي انطباع فوري أنك من الطبقة المخملية، وتاكل بالشوكة والسكينة، وتصيّف في أوروبا وكل هذا بدون ما تقول ولا كلمة.
الرولكس غيرت قوانين الساعات ومفهوم الكشخة، وكل القصة بدت يوم رجل الساعة هانس ويلزدورف طلع بفكرة أن الساعات لازم تنلبس على اليد مو الجيب وأنشأ شركته مع أخو زوجته في لندن سنة 1905.
هانس كان بيّاع بالفطرة واستغل كل حدث حوله أنه يسوّق لساعته الجديدة، فمثلاً لما أصدر أول ساعة مضادة للماء سماها "أويستر" طلب من السباحة مارسيدس جليتز تلبسها وهي تعبر القناة الإنجليزية، وطبعاً مافي داعي نوصف الانبهار اللي صار لما وصلت الساعة سليمة في يد السباحة بعد 10 ساعات من السباحة في الماء البارد.
أيام الحرب العالمية الأولى لعب هانس على الوتر الحساس، وسوّق لساعته أنها مناسبة للجنود بدل ساعات الجيب وأن الجنود يقدرون يخلون عين على الساعة وعين على البندقية وهذا الشيء بينقذ حياتهم
ركز هانس على أنه يبيع الرولكس لطبقة معيّنة تقدّر جودتها ودقتها، وخلاها حكر على المشاهير والأغنياء وتقصّد أنه يخلي العرض أقل بكثير من الطلب في جميع الأوقات، والنتيجة صارت أنك لما تشتري رولكس أنت ما تشتري ساعة، أنت تشتري أصول، إرث عائلي، مكانة وإنطباع عالي.
عشان لا تقول ما دريت! أهم الإيفنتات الجاية
صدعت وأنت تدور شركة للتصوير؟ 🎥
لاتتعدا شركائنا الرهيبين Story,Inc
يوثقون لك أحداث شركتك بأعلى جودة وأفضل سعر 💰
إيفنتات الرياض:
Demo Day تقدم 2024
(3 March)
يوم عرض الشركات ضمن مسرعة تقدم التابعة لكاوست، ولأول مرة بيصير في الرياض
Leap 2024
(4-7March)
الحدث الأضخم في المنطقة للتقنيات الجديدة 🧑💻
وظفني في ستارت أب
مطلوب
Digital Marketing Manager
مهووس بالنمو ويدعم كلامه بالأرقام
الشركة: T2
للتواصل: hr@t2.sa
مدير تسويق
يفهم في الناس والعقار 🏗️
الشركة: عقار
للتواصل: abdulaziz@zto.sa
تحتاج موظفين لشركتك؟ راسلنا على info@zto.sa
ملاحظة: ترا مانوصي إلا بناس أذكياء
خاتمة
