🛍️دليلك لأوقات شراء السعوديين أونلاين
ليش أسعار شي إن رخيصة؟
تحب عالم الشركات الناشئة؟
زهقت من المحتوى المسلوق والمكرر؟
حنا مثلك
عشان كذا سوينا هالنشرة اللي بتكون متنفس لنا ولك كل أسبوع 📰
نشرتنا بيكون فيها:
تفاصيل وتحليلات حصرية لأهم الأحداث 🕵️♂️
حركات رهيبة تلهمك 💡
شركات ناشئة جديدة 🇸🇦
تذكير بأهم الإيفنتات + دعوات لفعاليات حصرية📮
نساعدك توظف و تتوظف في شركات ناشئة محلية 🏦
أوه, قبل ماننسى, ترا موجود نكت بايخة و MEMEs
ليش؟ لأن الحياة أقصر من كذا
مصطلحات ريادية:
ماعليك, ما بنختلف على الفلوس
=
أكيد بنختلف على الفلوس لكن حاليًا ماعندي طاقة أناقش الموضوع
تقرير الأسبوع📊
سلوك العملاء في تابي
نشرت شركة تابي تقرير خفيف بمعلومات مفيدة، يحللون فيه سلوك المستهلكين (اللي يستعملون خدمتهم) في السعودية والإمارات للسنة الماضية، يركز على جانبين:
1- متى العملاء يشترون؟
2- كيف العملاء يدفعون؟
بنبدأ من المواسم في السنة وننزل للساعة:
وش أفضل موسم؟
نلاحظ أن الموسم اللي ما يضاهيه شيء في السعودية هو اللي يتوافق مع الراتب قبل العيد (وافق 10 رمضان)، وعلى العكس فإن أسوأ فترة شراء تكون في الراتب اللي بعد العيد مباشرة وبعدها فيه توازن أكبر في مواسم الشراء (ترتفع شهر وتنزل الشهر اللي بعده).
بينما في الإمارات، فيه موسمين متساوية تقريبًا، وهي تخفيضات العيد والجمعة البيضاء
أيام الشهر
لو بنركز على أيام الشهر، بنلقى أن قمة المبيعات دائمًا تتركز مع نزول الرواتب في يوم 27 ويوم 1، وتكون في أضعف حالاتها في النص الثاني من الشهر.
وفيه ارتفاع ثاني ملحوظ حوالي يوم 10 من الشهر، ويعزونه أن بعض الشركات رواتبهم تندفع على دفعتين والثانية تكون بيوم 10
أيام الأسبوع
الجمعة هو الأضعف لأنه يوم خاص في مجتمعنا للمناسبات والجمعات، فبالتالي هو أفضل يوم لأنشطة مختلفة غير التجارة الإلكترونية (المطاعم - السينما - الصالات - الشاليهات.. إلخ)
الأحد هو أطلق يوم، ويعزون أنه عادةً مع بداية الأسبوع الكثير يكون فاضي يتسوق أونلاين، وكذلك تحليلات حساباتهم في السوشل ميديا تقول أن الأحد هو أعلى يوم تفاعل (واضح هروب من الدوام)
الساعة ⏱️
أضعف فترة لكل يوم هي: 4ص-12 الظهر
القمة اليومية: 8م-12 الليل
حركة قديمة بس رهيبة
نموذج عمل حراج
كم مرة دخلت تتصفح في حراج وغطست؟ 🤿
كلنا مثلك, ندخل نبي كامري مستعملة 🚙 بعدين نكتشف إننا نتصفح إعلانات ببغاء أفريقي يتحدث لغتين 🦜
حراج تأسس سنة 2008
والشيء المميز, غير عن تجربة المستخدم البسيطة, كان نموذج العمل 💰
في بدايات حراج كان نموذج العمل عبارة عن تحويل عمولة من البيعة اللي صارت, تقريبا 1%
كيف حراج يضمن حقه؟ يخليك تحلف 🤲🏻
والفكرة هذي بحد ذاتها عبقرية 💡
ليش؟
نموذج عمل حراج المبتكر مناسب للسوق اللي يعمل فيه
في دولة يكاد يكون كل من فيها مسلم ولله الحمد🇸🇦, ثقافة الأمانة يتفق عليها الكثير وعواقب الحلف الكاذب معروفة
يقول النبي ﷺ: من حلف على يمين هو فيها كاذب يقتطع بها مال امرئ مسلم بغير حق [لقي] الله [وهو] عليه غضبان وفي اللفظ الآخر: فقد أوجب الله له النار، وحرم عليه الجنة.
حراج صنع نموذج عمل مصمم لثقافة وأخلاق المجتمع يقول شوارتز, أحد علماء علم النفس الاجتماعي, بأن الأعمال التجارية التي تمثل أخلاق وقيم المجتمع التي تعمل فيه, تكون مستدامة أكثر و ذات أرباح أعلى
هل الحلف يكفي؟ واضح إنه يكفي لأن قيمة حراج التقديرية في 2016 وصلت لأكثر من 600 مليون 💰
حقائق عن حراج:
- النسبة الأكبر من الدخل تأتي من عمولة البيع (السيارات في المرتبة الأولى)
- نموذج العمل أصبح يحتوي على اشتراكات تدفع مقابل مميزات مثل إضافات عدد أكبر من الإعلانات
و وجود علامة خاصة لزيادة الموثوقية
ستارت أب فنانة ماحد يعرفها: وكل
فيه أعمال ثقيلة على النفس وتحس بتأخذ يومك كله 😩
منها: الروحة للمحامي 👨🏻💼
دايم تحس إنه بيقيم أتعابه بناء على شكلك وبنفس الوقت ماتقدر تلبس ثوب النوم حق سوق الغنم و تروح له 🤷🏻♂️
الحل: وكل 👍🏼
وكل تخليك تحط استفسارك/مشكلتك بشكل محايد وبدون صورتك الحلوة 🖼️
والأحلى, المحامين هم اللي بيتنافسون عشان يقدمون لك أفضل عرض وأنت جالس مروق وتتقهوى ☕️
نحب نشكر ناصر الشريدة على الستارتب وحل المشكلة 🙏🏼
قصص وعبر
السر وراء أسعار شي-إن الرخيصة
إذا جاء طاري شي-إن, أول شيء يجي في بالك الأسعار الرخيصة
لكن كثير مايعرف إن شي-إن (جملة غريبة ندري) اكتسح سوق الموضة السريعة وتقييم الشركة وصل لـ 100 مليار
بس وش سر هذا الاكتساح؟ وليش أسعار شي إن رخيصة؟
بنعطيكم ثلاث أسباب:
1. التقنية
شي إن قدروا يطورون تقنية متقدمة تخليهم يتنبؤون بذوق المستهلك.
في البداية يصممون قطع معينة للتجربة ويسوون منها عدد بسيط, وبناء على تفاعل العملاء معها في الموقع أو التطبيق (إما أنك طولت وأنت تتفرج أو حطيتها في السلة)
يعرفون على طول إذا عليها طلب أو لا وبناء عليه يصنعون منها كميات كبيرة
2. الشبكة المرعبة للمصانع
شي-إن تقدر تصنع كميات هائلة من بضاعة معينة إذا عرفوا إن عليها طلب
المبهر في الموضوع إن العملية هذي كلها تتم بدون تدخل بشري
أول مايتعرف النظام إن فيه طلب عالي على قطعة معينة, على طول يطرح شيء شبيه بالمناقصة لشبكة المصانع اللي شي-إن معتمدها
بعدها, تدخل المصانع في المناقصة واللي يقدم السعر الأقل يفوز بعقد التصنيع
وكل هذا يتم في فترة بسيطة
أسعار أقل للتصنيع = أسعار أقل للبيع
3.الأيدي العاملة
التقنية مو السبب الوحيد اللي خلت شي-إن تقدم أسعار رخيصة, لأن رخص الأيدي العاملة في الصين أيضا يساعدهم في تقليل التكاليف بما يقارب 50% من المنافسين (H&M - Zara)
لكن الموضوع هذا ممكن مايكون أخلاقي 100%
قبل فترة انتشرت تقارير تقول إن شي-إن توظف ناس من منطقة Xinjiang وتخليهم يشتغلون في ظروف سيئة وبدون وسائل للسلامة, ونتج عن ذلك عدة حوادث
طبعا شي-إن تنفي كل الكلام هذا, وقررت تسوي مصانع خارج الصين في البرازيل وتركيا من باب الشفافية.
عشان لا تقول ما دريت! أهم الإيفنتات الجاية
صدعت وأنت تدور شركة للتصوير؟ 🎥
لاتتعدا شركائنا الرهيبين Story,Inc
يوثقون لك أحداث شركتك بأعلى جودة وأفضل سعر 💰
إيفنتات الرياض:
المعرض الدولي للتجارة الإلكترونية
(18-20 يناير)
الرياض
Demo Day تقدم 2024
(3 مارس)
يوم عرض الشركات ضمن مسرعة تقدم التابعة لكاوست، ولأول مرة بيصير في الرياض
Leap 2024
(4-7 مارس)
الحدث الأضخم في المنطقة للتقنيات الجديدة 🧑💻
وظفني في ستارت أب
مطلوب
كاتب محتوى
يبي يصير الأفضل وماعنده مشكلة يتعلم
الشركة: T2
للتواصل: hr@t2.sa
تحتاج موظفين لشركتك؟ راسلنا على hire@0t1.org
ملاحظة: ترا مانوصي إلا بناس أذكياء
خاتمة
قراءة ممتعة ومفيدة👍🏻
كل نشرة أفضل من اللي قبلها 👏🏼👏🏼 يعطيكم العافية