🤯💰ستارتب اكتشفت جلتش حقق 3 مليار

🚗🔥 الكيا اللي احترقت

صفر لواحد منصة إعلامية تغطي الشركات الناشئة المحلية 🕵🏻‍♂️📰

هدفنا؟ تمكينك💪🏼

مو لازم تكون جزء من إستراحة معينة ولا تعرف ناس واصلين💰

تابعنا بس وبتحصل إنك عرفت الكثير من المعلومات القيمة عن عالم الشركات الناشئة في السعودية🧑🏻‍💻

نشرتنا اللي تقرأها الحين بيكون فيها: 

• تفاصيل وتحليلات حصرية لأهم الأحداث 🕵️‍♂️

• حركات رهيبة تلهمك 💡

• شركات ناشئة جديدة 🇸🇦 

• تذكير بأهم الإيفنتات + دعوات لفعاليات حصرية📮

في حال ما اشتركت في النشرة وجالس تتصفح بس اشترك من هنا👇🏼

---

أسرع طريقة توسع فيها صدرك:

كلم مدير صندوق وقوله عندنا في العائلة 5 مليار ماندري وش نسوي فيها؟

وقتها بتشوف شخص مختلف عن اللي يطلع في الميديا🌹

---

أهم الأخبار: 🗞️

واعد فنتشرز يقود جولة استثمارية لشركة aiXplain الأمريكية💰

حصلت حلول الذكاء الاصطناعي الأمريكية على 6.5$ مليون في جولة استثمارية (Series A) بقيادة صندوق واعد فنتشرز المملوك لأرامكو السعودية 🧠🇸🇦🇺🇸سيسهم الاستثمار بفتح مقر إقليمي للشركة في السعودية ... تفاصيل أكثر

تِك مال تحصد مليون دولار في جولة استثمارية (Pre-Seed) 💰

توفر الشركة حلول التمويل المصغر لتمكين المستأجرين من الدفع مقابل الإيجارات السكنية بنظام شهري، بدلًا من نظام الأقساط السنوية والنصف سنوية المنتشر في السعودية 🏨🏠
قاد الجولة شركة الماجدية للاستثمار ومج.... تفاصيل أكثر

أخطبوط يجمع مليون ريال في جولة (Pre-Seed) 💰

يركز أخطبوط (شركة عناية السيارة) على حلول غسيل وتلميع السيارات المتنقل حسب الطلب، وتأسس عن طريق أحمد العيسى ولون استديو في عام 2023 🚗جاءت الجولة بمشاركة .... تفاصيل أكثر

---

سكوب الأسبوع: ودائـع 🕵🏻‍♂️

الشركاء المؤسسين لـ”ودائع”، عبدالله العندس وريان التويجري مع إشارة “صفر لواحد”

ودائع هي شركة تقنية مالية جديدة، ومثل الواضح من اسمها تمكن المستخدمين من الوصول للودائع بأرباح منافسة وخيارات متنوعة متوافقة مع الشريعة ✅

بكل بساطة، بدل ماتجلس فلوسك في البنك يربطونها لك بوديعة تحقق لك أرباح 💰

ودائع أطلقت خدماتها رسميًا قبل أسابيع كأول فنتك تقدم منتج في الودائع الزمنية، لهالسبب جلسنا مع عبدالله العندس الرئيس التنفيذي والمؤسس عشان يعطينا معلومات أكثر وهذي زبدة جلستنا معه:

• عملت في قطاع الخزينة في بنك البلاد 2015 بعد التخرج، والخزينة ببساطة هي زي العمود الفقري للبنك تساعد البنك يدير قوائمه المالية بشكل سليم وتضمن أن البنك مستثمر جميع سيولته بأفضل عائد ممكن وأقل مخاطر، وإذا احتاج البنك سيولة فالخزينة تساعد البنك بالحصول عليها بأسرع وقت وبأقل تكلفة ممكنة🪙

• في 2017 حسيت بمشكلة أن الأفراد والمنشآت ما تقدر تحط ودائع زمنية عند البنوك إلا إذا صاروا فوق حد معين من السيولة، وفيه نوع آخر من العملاء دائمًا عنده شك بالعائد اللي تعرضه عليه بأنه قليل وأنه صعب عليه يبحث عند باقي البنوك، وحتى لو حصّل عرض أفضل فصعب أنه يفتح حساب جديد وينقل أمواله فقط لربط الوديعة ويخسر باقي مزاياه في بنكه الحالي كعميل مصرفية خاصة أو شركات!⛓️

• كلمت هيئة سوق المالية وقتها وقلت لهم أبغى أطبق فكرة ودائع، قالوا عشان نتكلم معك هل عندك قيمة ترخيص مؤسسة مالية رأس مالها 50 مليون؟ "طردوني بأدب"🚪

• وؤدت الفكرة ورحت بعدها بسنة لأمريكا لدراسة الماجستير📚

• صدفة عند المترو في أمريكا شفت وجه مألوف ومشبه عليه، قلت ريان التويجري؟ التفت علي وقال لي أنت العندس؟ 🤝 وبعد حديث بسيط طلعت أنا وريان دارسين في مادة عند دكتور في جامعة الملك سعود ولا قد تقاطعنا! ومن هنا بدت العلاقة وهو عرفني هناك على شريكنا الثالث عبدالرحمن الحواس📔

• على سبيل المشاورة في 2020 مع بداية تشريعات الفنتك في السعودية قلت أكيد التشريعات بتتغير وبيصير فيه شيء وما دام صار فيه مختبر تقنية مالية عند الهيئة والبيئة التجريبية عند ساما فأنا بشتغل على ودائع! قابلت اثنين معي بالبنك سابقًا وقلت لهم الفكرة ورفضوا ياخذون المخاطرة 🫸

• رجعت للسعودية في نهاية 2021، وقتها فكرة ودائع لا زالت تلعب برأسي، وبدأ زخم في السعودية على أدوات الدين ومنتجات الادخار وقلت خلني أبدأ💭

الترخيص:

• جهزت White Paper عن فكرة ودائع، وعرضتها على الهيئة وأبدوا انفتاحهم في البداية🌅

• بديت في ودائع وقعدت شهرين أصفق لحالي 👏 وأنا أقابل ريان وعبد الرحمن 2-3 مرات بالأسبوع وأشاورهم على كل اللي صار، لكن بعدين بعد شهرين وصلت لقناعة أن يد وحده ما تصفق. حسيت الموضوع يحتاج فريق وقتها عرضت على ريان وعبدالرحمن تأسيس ودائع وفعلاً هذا اللي صار وقدمنا على الهيئة في 2022🧑‍🤝‍🧑

• بعدها الهيئة بلغتنا أنهم بعد مراجعة ومناقشات ما يقدرون يصرحون لنا، لأن الودائع ما تعتبر "أوراق مالية" خاضعة لرقابة وتنظيم هيئة السوق المالية ❌

• اتجهنا بعدها للبنك المركزي، وبدأنا في إجراءات التقديم والتصريح واستغرقنا سنة ونص🔥 (تم الترخيص في مارس الماضي، والإطلاق في مايو)

فريق “ودائع” لإدارة التشغيل من مكتب الشركة في الرياض

شلون تربط ودائع مع البنوك وكيف توفر حلولها؟

ممكن لما سمعت عن الربط خطرت في بالك المصرفية المفتوحة، لكن ودائع قدرت تربط مع جميع البنوك السعودية بشكل مختلف!

يقول عبدالله:

• حنا رابطين مع جميع البنوك بطريقة ذكية، رابطين مع قطاعات الخزينة مباشرة🏦، بحيث نجمع مبالغ المودعين ونقوم بمزاد على هالمبالغ بين كل البنوك السعودية وبذلك العميل يضمن أفضل سعر لو مبلغه ألف ريال ولا مليار!🥇

• تقدر تفتح حساب فرد في أقل من 3 دقائق، حساب شركات في 5 دقائق 🔓

• العملية مؤتمتة اليوم بالكامل فأنت تدخل كفرد ولا كشركة، وتستثمر أي مبلغ بدايةً من 1,000 ريال، تستثمر مثلًا في ودائع لمدة 3 أيام تبدأ الخميس وتنتهي الأحد، أنت تناظر نهاية الأسبوع ما يجيني إلا ربح 3 ليالي، لكن هذي لما نضربها 52 أسبوع في سنة وتضيف لها الاجازات تطلع تقريباً 6 شهور بالسنة الكاش حقك 100% راكد 💸

• نوفر خيار "صمم وديعتك" لو مبلغك فوق 5 مليون، بحيث تحدد المبلغ والمدة اللي تبي🧩

• مشكلة تسويقية نواجهها حاليا أن كثير من العملاء ما يعلم بالأساس بهذا المنتج، ويعتقد بأن الربح السهل إما احتيال أو فيه إشكال شرعي. بينما في الحقيقة هو نفس القرض اللي كنت تأخذه من البنك، حنا عكسناه وخليناك تقدر تقرض البنك. وكل العمليات تتم إما مرابحة أو كالة مع البنوك

• تحدي آخر العميل ما يستوعب أن العائد لو كان مذكور مثلًا 5.5%، فهو عائد سنوي وهذا الستاندر في المنتجات المالية، ولا يعتبر عائد الوديعة اللي مدتها أيام أو شهر، فعندنا تحدي توعية السوق بهالمنتجات📖

• نموذج العمل: ناخذ هامش ربح ضمني بين السعر اللي يعطينا البنك وبين السعر اللي ياخذوه المستخدمين، يعني البنك أعطانا اليوم 5.6، نعطي العميل خمسة 5.5 وهكذا، وأحيانا ما ناخذ شي على حسب آلية السعر 💵

• اليوم إذا العميل سعر معنا ولاحظنا أن الأسعار كلها اليوم من 5 إلى 5.3 ولا 5.5 معناته ما تقدر تاخذ شي لأنه ما في قيمة مضافة للعميل فبالتالي انت تخسر العميل على المدى الطويل فهنا ما ناخذ شيء🆓

• عندنا تقدر تجي للمنصة وتقول عندي 10 مليون وتختار التاريخ اللي تبي، تبيها 75 يوم أو تبيها 20 يوم أو تبيها سنتين أو الفترة اللي تبي، نظامنا مباشرة ياخذ طلبك ويفتح مزاد لجميع البنوك ويجيب لك أفضل عائد في أقل من 3 دقايق 🔽

• هذا يخلي أبو 5 مليون واللي عنده مليار يربط في وديعة في أقل من ثلاث دقايق وهدفنا أنه هذا يصير أقل من دقيقة ⏩

• هدفنا اليوم أن الشركات تحلل الريال اللي عندها يعني بشكل كامل ولا يقعد ولا يوم الريال عندها بدون ما تستفيد منه وهي بالنهاية كلها ودائع مخاطرها بمستوى مخاطر الفلوس بالحساب الجاري🤑

السوق:

• في أمريكا لو فتحت حساب بنكي فهو مباشرة حساب ادخاري يحقق لك عوائد، والوصول لودائع زمنية متاح عن طريق العديد من القنوات. عندنا في السعودية العكس تمام، الحساب الجاري هو الأساس ولفترة قريبة كانت 25% من مجموع ودائع البنوك في ودائع حسابات جارية، بينما في السوق الأمريكي على سبيل المثال 75٪ من الودائع هي ودائع زمنية وادخارية وتدفع عليها البنوك أرباح لعملاء. فالسوق لا زال عندنا بحاجة لتوعية كبيرة جداً ولمقاربة هيكلة الودائع لدى البنوك العالمية⬇️

• لا زلنا بحاجة لمزيد من الحلول اللي تمكّن من تعديل وضع السوق ورفع هالنسبة بالشكل المناسب

• حجم الودائع في البنوك السعودية 2.1 ترليون ريال سعودي، تشكل الودائع الزمنية والادخارية منها ما يزيد عن 800 مليار، والباقي حسابات جارية

• الناس تركيزهم بالسعودية على Capital Market بما فيه من أسهم وصكوك وصناديق ولكن في هناك ما يسمى بالـ Money Markets أو ما يمسى بأسواق النقد يفوق بحجمه أسواق رأس المال 💹

المستهدفات:

• هدفنا الوصول كإجمالي ودائع 3 مليار خلال عام، والعام القادم 10 مليار📈

• نستهدف منتجات جديدة تحت نفس الترخيص🆕

• مستمرين بمنتجاتنا لخلق قيمة مضافة للشركات الناشئة والجمعيات والأوقاف

المقابلة الكاملة مع عبدالله بتلقونها قريبًا في موقعنا!🔥

---

مدير Apple اللي تسبب في 10 مليار خسائر 😨

رون جونسون👱🏻‍♂️

في ٢٠١١، عيّنت J.C. Penney رون جونسون، أحد التنفيذيين السابقين في أبل، كرئيس تنفيذي مع الأمل أنه يقدر ينعش سلسلة المتاجر اللي كانت تعاني. كانت التوقعات عالية بأنه سيحدث تغيير جذري ويعزز أداء الشركة. لكن اللي صار كان العكس تماماً 🛑

نبذة عن رون جونسون 🔍:

كانوا يسمونه عبقري التجزئة و كان له محطتين مهمة في حياته 👱🏻‍♂️:

• Target: عمل جونسون في تارقت حيث ساعد في تطوير مفهوم "التسوق الممتع"، مما جعل متاجر تارقت أكثر جاذبية للعملاء 🛍️

• Apple: في أبل، تولى جونسون منصب نائب الرئيس لتجارة التجزئة وكان له دور كبير في تصميم وتطوير مفهوم متاجر أبل التي تميزت بتصميمها الأنيق وتجربة العملاء الفريدة لين صارت متاجر أبل وجهة رئيسية لعشاق التكنولوجيا حول العالم 🍎

  

نبذة عن JCPenney:

JCPenney، واحدة من أقدم وأشهر سلاسل المتاجر في أمريكا، تأسست في ١٩٠٢. كانت دائماً معروفة بعروضها وخصوماتها الجذابة (نفس حقين العطور عندنا دايم عندهم 70% خصم طول السنة) 🏷️🛒

وش اللي صار؟

أول ماصار جونسون الرئيس التنفيذي سوا تغييرين جذرية:

• إلغاء التخفيضات 🏷️: قرر جونسون يلغي الخصومات والعروض المستمرة اللي كانت تجذب الزبائن بشكل كبير. الناس كانوا متعودين على العروض، وبدونها، قلّوا الزبائن بشكل ملحوظ.

  كانت وجهة نظره إن التخفيضات ما تتناسب مع التجزئة الحديثة (كان عايش جو إنه عبقري التجزئة من جد)

• تجديد المتاجر🏬: حاول يغير تصميم المتاجر ويخليها حديثة، لكن التغييرات هذي كلفت الشركة كثير وما ماكان لها أثر إيجابي

  النتيجة؟

• انخفاض المبيعات: في السنة الأولى من الاستراتيجية الجديدة، انخفضت مبيعات JCPenney بنسبة ٢٥٪، مما أدى إلى انخفاض في الإيرادات بمقدار ٤.٣ مليار دولار 📈

• خسائر كبيرة: الشركة سجلت خسائر مالية ضخمة في ٢٠١٢، بما في ذلك خسارة صافية تقارب مليار دولار و خسارة في القيمة السوقية للشركة حول 4 مليار (قاعدين نسولف عن المليار كأنه ألف ريال مدري ليش؟) 💸

الدروس المستفادة 📚:

1. فهم الجمهور المستهدف: لازم تعرف عملائك وتفهم احتياجاتهم وتوقعاتهم. جونسون واضح ماكلم عملائه وقرر من راسه إنه هو يعرف وش يبون 👎🏼

2. التدرج في التغيير: التغييرات الكبيرة تحتاج وقت وتخطيط. لازم تبدأ بالتغييرات الصغيرة وتراقب النتائج قبل ما تتخذ خطوات أكبر ✅

3. التواصل مع العملاء: التواصل المستمر مع العملاء وفهم ردود أفعالهم تجاه التغييرات أمر مهم عشان تضمن إنك ما تخسر ولاءهم 🥰

---

حركة أعجبتنا: تفاعل كيا 🚗

السالفة باختصار إن فيه سيارة من نوع كيا احترقت على الطريق نتيجة خلل مصنعي. الخلل تم الإعلان عنه من الوكيل وتم إصلاح جميع السيارات لكن صاحب السيارة مادرا عنه والنتيجة احترقت سيارته بالكامل 😢

قبل ما ينتشر المقطع على نطاق واسع تفاعل وكيل كيا المحلي بشكل إيجابي وأعلن إنه بيهدي صاحب السيارة المتضررة سيارة جديدة, على الرغم إنه مو ملزم قانونيًا 👨🏻‍⚖️

النتيجة؟ تغريدة الهدية للسيارة الجديدة حققت لحد الآن 4 مليون مشاهدة و 10 آلاف إعجاب, يعني عائد تسويقي ممتاز + الحفاظ على السمعة مقابل مبلغ زهيد ✅

الصورة من سناب محمد بن مفرح والفقرة برعاية عروج

---

ستارتب فنانة ماحد يعرفها: Gamifier SA 🕹️

عبدالله الحجي مع إشارة “صفر لواحد”

لعب x لعب 🕹️

لا مو سبة, هذي هي فكرة قيميفاير اللي تتمحور على التلعيب (Gamification) وهدفها تحويل تجربة الاستخدام التقليدية لتجربة تفاعلية، وبالتالي تسلي وتمتع المستخدم وترفع من وقت استخدام العميل وولاءه 🧩

الشركة تأسست عن طريق عبدالله الحجي في 2020🚀 وتستهدف مجالات مختلفة وأهداف متنوعة؛ تعليمية، ترفيهية، توعوية، وغيرها 🕹️🎱

منتجات الشركة:

1.  Points Go: يركز على تحسين تجربة السياحة في المملكة 🇸🇦

2. Landi-fier: إضافة لمواقع الويب تزيد من تفاعل المستخدمين من خلال دمج الألعاب والحوافز بالمواقع 💻

3. Check-fier: نظام موجه لأصحاب المقاهي والمطاعم وهدفه تعزيز التفاعل والولاء من خلال النقاط المكتسبة ☕️🧑‍🍳 

4. EDU-fier: نظام موجه للطلاب يحول العملية التعليمية إلى تجربة تفاعلية من خلال دمج عناصر الألعاب مثل النقاط والمستويات في سياق التعلم 🧑‍🎓👩‍🎓

كل التوفيق لقيميفاير، ويمديك تشوف موقعهم هنا وتتعرف عليهم أكثر 👏

---

لو عندك خبر في عالم الستارتب وماشاركتنا إياه…محد بيدري عنه 👎🏼

مجموع متابعينا على كل المنصات تجاوز الـ 100K 🤯

تواصلوا معنا على: newsletter@zto.sa 💌

---

خاتمة